قصيدة نيزك

نيزك

نون النسوة في الأول
اسم زانك جمال ملكات
وألف الألفة في وسط الاسم
مكتوبة زي نجم السعد قصاص
بيهدينا الطريق نوصل
وزا حرف الاسم زاتو
بأكد فيك قوام مياس
وكاف كيفن نباري سراب
وهم خداع بضلل كل زول عطشان
وأنتي ينابيع الحنان والذوق
وزي ما قلت أنت ملاك
شبيه انسان
حروف اسمك تفند ..فيك علا وهامه
تأكد فيك ..براءة أطفال
وروح ورده
ووصفلك ما بتم أشعار
غنى ودوبيت كمان مسدار
لأنك سامية يا نيزك
رجم شيطان عدو الريده
بخاف لو مره
صارحتك على الريده
أكون جرحت
قلب صادق مع الريده
قلب برجاه كل صباح
عشان ألقاه مع الصحبه
عشان نظرة و كمان كلمات
كمان كلمات سلام
كيفنك الليلة وزي عينيك
كحيلة بدون كحل فيها
وزي شفتيك مندية زي رزاز
بلل غصن ورده ونزل ندى
جبين هامة كمان وجنات
وسمح البسمة فيك رمشات
مظلله في العيون زي غيمة صيفيه
وسمح ألمشيه فيها حنان
خطا بتتقدل مساري الريده
زي سبح زي الحصين والخيل
وسط ظلمة سكون الليل
عليل نسمات ..وصوت الناي
بريدك يومي أنا الشفتك
معاك دفتر على حضنك
محشمه ماك أنتي
الوسط خلق الكريم
صوتك
علا الأصوات
بريد كل حاجة فيك
يا ريد غذاء الروح
بريد كل شئ جميل رسمك
شعار العفة والريده
بريدك جد..بريدك جد
وريدك ساكن الطيات
بريدك جد ..محال أنساك
ويوم أنساك
بكون آخر ثوانيني البعيش فيها
بكون آخر نبض في القلب
بدق بي صوت بقول بهواك
تكون انتي الشهادة عديل
وحسن الخاتمة بيك يا غرام
سكن جوه القليب ردد مع النبضات
اصول الحب .. معاك يا ريد
ويوم ما ألقاك ..بتسرحي
والزمن غلاب
بقول يا ريتني لو بقدر
أشيل كل الهموم منك
وما بشكيك يا غالية
أنا ألراجيك تكوني
همي .. تغلبيني
عشان البسمة فيك بلسم
بداوي وحيد.. يواسي حزين
وانتي سعادتي في الدنيا ألبقت جانية
وانتي سعادة الغلبان
وقبلة السادة والصلاح
بلاك الكون بكون حلاك
عشان قمرو البضوي الليل
صبح ما في
ولا في زهور
ولا أشجار ولا في سحاب
ولا في ربيع
يعيد رونق شباب الأرض
ولا في كلام جميل معسول
حيطلع من قلوب الناس
بلاك حنيه معدومة
حتبقي غريب
وطن عشت فيه ميلادك
بتتضلل شوارعو سؤال
كأنك انت ما فيهو
ولا صادفتو بالمرة
تسيل دمعات شباب وشياب
تسيل تجرف معاها
حنين مشاعر ناس
عواطف ما في
ولا في حبيب حيتذكر
معالم ريتو لا في
حبيبة تتذكر
حبيبها الطيب الإنسان
عشان بس تعرفي الريد
القبيل شالو القلب صدفة
سكن جوه القليب بركان
بثور كل حين
بثور لو شاف معاك غيرو
بثور بحرق حشاه وكاتم
هو لا صرحبو شان يرتاح
ولا حكا بيهو للخلان
يقاسموا الآهة و الأنات
لأنك في وسط أشباح
ذئاب بشريه لابسه قناع
بي وش انسان
بريق بسماتم ما يعجبك
لأنها فتره زمنيه
بكون فيها شخصيه
في يوم حيجيك
يشيل منو القناع قاصد
تشوفي حقيقة الراشد
بعد ما يلقى ما رادو
يخليك انتي بتقاسي
بدون شرفك .. بدون عفة
وأنا الراجيك ..و هيمان بيك
ما حاقدر .. أقدم شئ
سوى
إني حضمد جرحك النازف
ولما فجر صبحنا يحين
بيصرخ قلبي زي آذان
يقول في صرختو الريدة
هو بشهد بيك
وبتمناك لانو لقاك فلاح
الدنيا .. و الآخرة
أكيد حاتوض حن عينيك
عشان ألحق صلاة الشوق
ولم وقت لقاكي يحين
يجيك ولهان
ويركع في حرم خديك
ويسجد طالب الغفران
وتبقى الذكرى نافلتو
ونصبح سنة العشاق
ونبقى القبلة للهيمان
نكون عنوان
فصول قصة عن الريدة
علم خفاف
يرفرف في علا الأيام
لا قدر الزمان هزاه
لا خانو الزمن وطه